سياسة الخصوصية

اللي مابنجمعوش

شاشة الصاغة مابياخدش اسمك ولا رقم تليفونك ولا إيميلك. مافيش حساب تعمله ومافيش تسجيل دخول.

مابنستخدمش أدوات تتبّع إعلانية ولا بنبيع أي بيانات لأي حد، لأن مافيش بيانات نبيعها من الأصل.

الحاجة الوحيدة اللي بتتخزّن عندنا هي تنبيهات الأسعار لو فعّلتها بنفسك — وتفصيلها في قسم «التنبيهات» تحت.

اللي بيتخزّن على تليفونك — وبيقعد فيه

الذهب اللي بتسجّله في «ممتلكاتي» (الوزن والعيار واللي دفعته وتاريخ الشرا) بيتخزّن في ذاكرة التطبيق على جهازك.

صور الفواتير اللي بتصوّرها بتتحفظ في مجلد التطبيق على جهازك.

الحاجتين دول مابيتبعتوش لأي سيرفر — لا سيرفرنا ولا غيره. لو حذفت التطبيق بيتحذفوا معاه، ومافيش عندنا نسخة منهم.

إعداداتك (المظهر مثلاً) بتتخزّن على الجهاز كمان.

اللي بيوصل للسيرفر

التطبيق بيطلب الأسعار من سيرفرنا. الطلب فيه الأسعار المطلوبة بس — مافيهوش أي حاجة تعرّفك.

زي أي سيرفر على الإنترنت، كلاودفلير (اللي مستضيف السيرفر) بيسجّل بيانات تقنية مؤقتة زي عنوان الـIP لأغراض الحماية من الهجمات. إحنا مابنقراش السجلات دي ولا بنربطها بأي حد.

التنبيهات — لو فعّلتها

التنبيهات مقفولة افتراضياً. مافيش حاجة بتتخزّن عننا غير لو دخلت شاشة التنبيهات وفعّلتها بنفسك.

لما تفعّلها، بيتخزّن عندنا: كود الجهاز (توكن بتديه جوجل للتطبيق، مش رقم تليفونك ولا معرّف الجهاز)، نوع التنبيه (سعر معيّن، نسبة حركة، نقطة تعادل)، الرقم اللي طلبته، ووقت آخر تنبيه اتبعتلك عشان مانبعتش مرتين في اليوم.

مافيش اسم ومافيش إيميل ومافيش رقم تليفون ومافيش حساب. مافيش طريقة نعرف بيها مين انت من البيانات دي.

تنبيهات الأندرويد بتمرّ من خدمة Firebase Cloud Messaging (جوجل)، وده مش اختيار عندنا — كل تنبيهات الأندرويد في الدنيا بتمشي منها. جوجل بتشوف كود الجهاز ونص التنبيه وقت التوصيل.

لما تمسح أي تنبيه من الشاشة، بيتمسح عندنا فوراً. ولو مسحت التطبيق، أول مرة نحاول نبعتلك جوجل بتقولنا إن الجهاز مابقاش موجود وبنمسح كل حاجة ليه.

مابنستخدمش التنبيهات في إعلانات ولا عروض ولا أخبار. اللي بيوصلك هو الرقم اللي انت طلبته بس.

الموقع

موقع shashetelsagha.com مافيهوش كوكيز تتبّع ولا إعلانات ولا تحليلات بتتبع الزوار.

الخطوط والصور كلها مستضافة عندنا. الصفحة مابتعملش أي طلب لأي سيرفر تاني — مافيش خطوط جوجل ومافيش مكتبات من CDN، فمافيش حد غيرنا بيعرف إنك زرت الصفحة.

لو فعّلت تنبيهات المتصفح، بيتخزّن رابط الاشتراك اللي المتصفح بيديه ومفتاح تشفير. الاتنين خاصين بالمتصفح ده ومايعرّفوكش، ونص التنبيه نفسه مشفّر ما بيننا وبين متصفحك.

إعداداتك في الموقع (إنت بتشتري ولا بتبيع، والذهب اللي مسجّله في «ذهبي») بتتخزّن في متصفحك بس — مابتوصلش لنا.

الأسعار

الأسعار بتتجمّع من مصادر عامة في السوق المصري وبتتحدّث كل ٥ دقايق. وهي استرشادية للمقارنة — مش عرض بيع ولا شرا مننا، والسعر النهائي بيتحدد في المحل.

الحاسبات بتحسب بالأرقام اللي إنت بتدخّلها وبأسعار السوق المعروضة. النتايج مساعدة في القرار، والمسؤولية عن أي قرار بيع أو شرا مسؤوليتك.

حاسبة الزكاة بتحسب القيمة بس. التقدير الشرعي النهائي ارجع فيه لأهل العلم.

الأطفال

التطبيق مش موجّه للأطفال تحت ١٣ سنة، ومابنجمّعش بيانات من أي حد عن قصد.

لو الشروط اتغيّرت

أي ميزة جديدة بتغيّر اللي فوق (زي التنبيهات اللي محتاجة توكن للجهاز) هتتكتب هنا مع نفس التحديث اللي بيضيفها، مش بعديه.

وسؤالك عن أي حاجة هنا

الصفحة دي بتقول إيه اللي بيتخزّن. وحدود استخدام الأرقام والمسؤولية مكتوبة في شروط الاستخدام، ومين إحنا ومن فين بتيجي الأسعار في صفحة من نحن.

ولو فيه حاجة هنا مش واضحة أو شايف إن فيه بيانات بتتجمّع من غير ما نقولها، ابعتلنا — ده النوع اللي بيتراجع في نفس اليوم.